Велиме големо „да“ за зимските прошетки на вашите малечки

Велиме големо „да“ за зимските прошетки на вашите малечки.

Препораката на педијатрите е дека најдобрите временски услови за уживање во зимските прошетки на вашите бебиња  подразбира надворешната температура на воздухот да е десет степени и повисока, но тоа не значи дека не е во ред да одите на прошетка со вашето малечко дури и при пониска темепратура.  Оптимално време поминато надвор е околу половина час.

Првата прошетка во ладните зимски денови планирајте ја со навршени три недели, а кога ќе тргнете на прошетка внимавајте бебето да биде добро облечено и заштитено од ладниот воздух ( еден слој облека повеќе од вас ). Не заборавајте, бебињата секогаш треба да ги облекувате слоевито, сепак, бебињата потешко поднесуваат топлина отколку посвежо време.  Облеката секогаш треба да биде памучна, од природни материјали. Горниот слој на облека треба да имате можност лесно да го соблечете доколку на бебето му е топло. Доколку вратот кај бебето е топол и испотен, тоа значи дека на бебето му е претопло. Во спротивно, ако е студен или гледате дека бебето благо трепери потребно е дополнително да го затоплите.

Особено е важно да ја заштитите главата на бебето. Капата лесно ќе го затопли и исто така лесно ќе ја тргнете доколку му се стане претопло. Исто така внимавајте и на рачињата. Ракавиците без прсти изработени од природни материјали успешно ќе ја задржат топлината на малите детски рачиња.

За текстилна изолација на бебешките колички со цел да се намали протокот на студен воздух до бебето кое престојува во количката размислувајте дури тогаш кога ќе одлучите дека временските услови навистина го наложуваат тоа. Ваков тип на изолација ( поставување на одреден вид на платно преку количката или слично ) е крајно контрапродуктивно во текот на летниот периот-избегнувајте го!