Семејството е начин да се доживее чувството на припадност

Топлиот дом и среќното семејство се скапоцен дар кој можете да му го дадете на вашето дете.

Германскиот педагог Херман Гизек во своите дела јасно покажал дека семејството има мноштво функционални идеали и е од важно значење за формирањето на детската личност.

Домот треба да биде околина во која детето секогаш ќе се чувствува сигурно, без разлика дали активностите и обврските ги извршува успешно или не, а семејството е начин да се доживее чувството на припадност чие постоење има голема важност за креирање на емотивно стабилна личност во иднина.

Според овој педагог, единствено во семејството е можно целосно задоволување на основните човекови потреби за љубов, сигурност, признавање и доверба. Сите други социјални групи во кои ќе се најде едно дете имаат само делумни, по време и простор, ограничени социјални и емотивни влијанија.

Семејството го запознава детето со основните социјални и културни норми претставувајќи еден соодветен модел на заеднички живот. Токму од тука потекнува и педагошкото значење на семејството. Имено, тоа се согледува во стилот и тонот на однесувањето на родителите меѓу себе и со нивните деца, во културните интереси што ги манифестираат членовите на семејството, видот и начинот на проценувањето на другите луѓе, начинот на вклучување на децата во домашните активности, начинот на однесувањето во конкретни животни ситуации и слично.