Брза пита со маслинки

За појадок или за вечера, оваа превкусна пита е секогаш одличен избор.

За нејзината подготовка ќе ви бидат потребни само петнаесетина минути, не сметајќи го времето за печење.

Потребни ви се следниве состојки:

2 шолји бело брашно

половина шолја ржано брашно

3 јајца

150 милилитри млеко

50 милилитри масло за јадење

200 грама рендано овчо сирење

150 грама маслинки без семка

1 кесичка прашок за пециво

сол по желба

ким за посипување

Начин на подготовка:

Јајцата изматете ги со миксер. Кога ќе добиете густа смеса додајте ги маслото за јадење и млекото. Продолжете да мешате со лажица. Откако смесата ќе се изедначи започнете постепено да го додавате и брашното, кое претходно сте го промешале со прашокот за пециво, исто така со континуирано мешање со лажица. Посолете по желба, но при тоа, имајте во предвид, дека сирењето е солено.

На крај додадете го и изренданото сирење и маслинките исечени на кругчиња.

Мешајте се додека не добиете хомогена смеса.

Семсата истурете ја во претходно подмачкана тепсија. Посипете со ким. Брзата пита печете ја во претходно загреана рерна на 200°С околу дваесетина минути.

На здравје.